Deutsche Bank með þrjá menn í stjórn Actavis

Claudio Albrecht, forstjóri Actavis, sagði í viðtali við fréttastofu í gærkvöldi að rekstrarárið 2010 yrði besta ár í sögu Actavis. Þá sagði hann að fyrirtækið myndi á næstunni ráða 60-100 nýja starfsmenn hér á Íslandi. Fyrirtækið tók högg vegna málaferla sem höfðuð voru í Bandaríkjunum, en það virðist þó ekki hafa staðið í vegi fyrir afar jákvæðgri afkomu. Málunum er öllum lokið með samkomulagi við stefnendur.

Fjárhagslegri endurskipulagningu Actavis er nú lokið og hefur framkvæmdastjórn Evrópusambandsins gefið samþykki sitt fyrir aðkomu Deutsche Bank að félaginu, en Deutsche Bank sendi framkvæmdastjórn ESB beiðni hinn 18. ágúst síðastliðinn á grundvelli tilskipunar um samruna og óskaði eftir samþykki Evrópusambandsins vegna samkeppnisréttarlegra sjónarmiða. Það hefur nú verið veitt.

Skipun nýrrar stjórnar félagsins hefur nú verið ákveðin þótt nöfn stjórnarmanna liggi ekki fyrir. Samkvæmt heimildum fréttastofu verða þrír fulltrúar frá Deutsche Bank í nýrri stjórn, tveir frá Novator og einn fulltrúi frá íslensku bönkunum, kröfuhöfum Actavis hér innanlands. Þá verður Claudio Albrecht, forstjóri Actavis, stjórnarformaður félagsins í sjö manna stjórn.

Höfuðstöðvar fyrirtækisins verða í framtíðinni staðsettar í Sviss og munu fimmtán starfsmenn flytjast héðan frá Íslandi þangað. Þess fyrir utan verður starfseminni haldið óbreyttri hér á landi, en Claudio Albrecht áréttaði í viðtali við fréttastofu í gærkvöldi að Actavis væri íslenskt fyrirtæki og það hygðist halda umsvifum sínum og starfsemi hér á landi óbreyttum.