Nýtt hlutafélag stofnað um rekstur Flugstoða og Keflavíkurflugvallar

Opinbert hlutafélag um sameinaðan rekstur opinberu hlutafélaganna Flugstoða og Keflavíkurflugvallar var stofnað síðastliðinn föstudag. Þórólfur Árnason, fyrrverandi forstjóri og borgarstjóri, var kjörinn formaður nýrrar stjórnar.

Tilgangur hins nýja félags er að reka alla flugvelli landsins og sjá um uppbyggingu þeirra ásamt tilheyrandi flugstöðvum og mannvirkjum, reka og byggja upp flugleiðsögu- og flugumferðarþjónustu og annast rekstur starfsemi sem er í beinum tengslum við flugrekstur. Nafn hins nýja félags hefur ekki verið ákveðið ennþá en heiti þess í upphafi er FLUG-KEF ohf.

Á stofnfundinum var stofnskrá fyrir félagið undirrituð og samþykktir félagsins samþykktar af fulltrúa fjármálaráðherra, Þórhalli Arasyni. Þá var kjörin stjórn og sitja í henni sjö aðalmenn og sjö til vara.

Aðalmenn eru: Þórólfur Árnason, Arngrímur Jóhannsson, Rannveig Guðmundsdóttir, Arnbjörg Sveinsdóttir, Ásta Rut Jónasdóttir, Ragnar Óskarsson og Jón Norðfjörð. Á stjórnarfundi að loknum stofnfundinum skipti stjórnin með sér verkum og var Þórólfur kjörinn formaður.

Í framhaldi af stofnfundinum verða í næstu viku haldnir hluthafafundir í Flugstoðum ohf. og Keflavíkurflugvelli ohf.

Kristján L. Möller, samgöngu- og sveitarstjórnarráðherra, flutti ávarp í lok fundar og sagði að stjórn hins nýja félags hefði með höndum umfangsmikið hlutverk strax á fyrsts degi. Hann kvaðst vænta þess að hún ætti gott samstarf við fjármálaráðherra og fjármálaráðuneytið svo og samgöngu- og sveitarstjórnarráðherra og samgöngu- og sveitarstjórnarráðuneytið. Hann sagði það verkefni samgöngu- og sveitarstjórnarráðherra að bera ábyrgð á faglegri stefnumótun félagsins í samvinnu við stjórnina. Óskaði hann að lokum hinu nýja félagi velfarnaðar.