Hannes skoraði og Ari Freyr gaf stoðsendingu í sigri Sundsvall

Hannes Þ. Sigurðsson og Ari Freyr Skúlason áttu þátt í mörkum Sundsvall í góðum 2-0 útisigri á Degerfors í sænsku b-deildinni í dag en með sigrinum komst Sundsvall-liðið upp að hlið Norrköping á toppnum.

Ari Freyr spilaði allan leikinn og lagði upp fyrra markið fyrir Jonas Wallerstedt einni mínútu fyrir lok fyrri hálfleiks.

Hannes kom inn á sem varamaður í hálfleik og innsiglaði sigurinn á 68. mínútu leiksins en hafði komið inn á fyrir umræddan Jonas Wallerstedt.

Norrköping og Sundsvall eru bæði með 40 stig á toppnum, hafa átta stiga forskot á næstu lið og eru á góðri leið upp í sænsku úrvalsdeildina.