Hafnarfjörður skilar afgangi upp á 441 milljónir

Rekstrarniðurstaða Hafnarfjarðarbæjar, A og B hluta, var jákvæð um 441 milljónir kr. á fyrstu sex mánuðum árins.

Í tilkynningu segir að fjármagnsliðir hafa nú jákvæð áhrif á heildarniðurstöðu reikninganna meðal annars vegna hagstæðrar gengisþróunar á tímabilinu. Rekstrarafkoma A hluta fyrir fjármagnsliði var neikvæð um 301 milljónir kr. og rekstrarafkoma fyrir fjármagnsliði A og B hluta jákvæð um 25 milljónir kr.

Samkvæmt árshlutareikningnum eru heildartekjur í samræmi við áætlun 2010 en hins vegar eru laun og launatengd gjöld hærri en áætlað var, sem skýrist m.a. af fleiri störfum í sumar hjá ungu fólki, hækkun tryggingagjalds og að áhrif hagræðingaraðgerða koma fram á seinni hluta ársins.

Mesta frávikið frá áætlun liggur í fjármagnsliðum en reiknaður gengishagnaður erlendra lána er 862 milljónir kr. og reiknaðar verðbætur voru heldur hærri en reiknað var með í áætlun. Þá hafa vextir af erlendum lánum lækkað enn frekar það sem af er árinu.

Heildareignir A hluta námu í júnílok 36,6 milljörðum kr. en fjárfestingar á tímabilinu námu 198 milljónum kr. Skuldir og skuldbindingar námu 32,4 milljörðum kr. og lækka um 855 milljónir kr. á tímabilinu. Tekin voru ný lán að fjárhæð 500 milljónir kr. til skuldbreytinga eldri lána en afborganir tímabilsins námu 827 milljónum kr. og eigið fé í júní nam 4.2 milljörðum kr.