Nýjar norrænar verðsveifluvarnir í kauphöllinni í dag

Nýjar norrænar verðsveifluvarnir verða innleiddar í Kauphöllinni á Íslandi í dag, í Eystrasaltsríkjunum og á öllum First North mörkuðunum og þann 30. september á aðalmörkuðum í Stokkhólmi, Helsinki og Kaupmannahöfn.

Í tilkynninug frá NASDAQ OMX Group segir að innleiðing nýrra verðsveifluvarna (Volatility Guards) á mörkuðum sínum á Norðurlöndunum og í Eystrasaltsríkjunum muni vernda fjárfesta og skráð fyrirtæki í hviklyndum markaðsaðstæðum.

"Nýju verðsveifluvarnirnar, sem byggja á eldri samnorrænum vörnum, mæta kröfum nútímans í viðskiptaumhverfi sem einkennist af hraða og háþróaðri viðskiptatækni. Innleiðing verðsveifluvarnanna mun auka frekar vissu fjárfesta og skráðra fyrirtækja um eðlilega verðmyndun á mörkuðum okkar á Norðurlöndunum og í Eystrasaltsríkjunum," segir Þórður Friðjónsson, forstjóri Kauphallarinnar.

„Eitt af því mikilvægasta sem við lærðum af nýlegri ókyrrð á mörkuðum og fjármálakreppunni er mikilvægi þess að samræma aðgerðir til að mæta óstöðugleika á markaði, en einnig til að takast á við margbreytileika samtvinnaðra og tæknidrifinna markaða nútímans".

Í NASDAQ OMX Nordic verðsveifluvörninni felst stöðvun og endurupptaka viðskipta í gegnum ferli sem hannað er til að koma aftur á eðlilegri verðmyndum í einstökum bréfum (hlutabréfum og kauphallarsjóðum) skráðum á NASDAQ OMX Nordic og Baltic kauphöllunum í Stokkhólmi, Helsinki, Kaupmannahöfn, Íslandi, Tallinn, Riga og Vilníus og First North vaxtarmarkaðnum.

Norræna verðsveifluvörnin mun verða notuð ef tilboð víkur hlutfallslega um of frá síðasta söluverði (Dynamic Volatility Guard) eða frá viðmiðunarverði, sem er venjulega upphafsverð dagsins (Static Volatility Guard). Þegar verðsveifluvörn er virkjuð, stöðvast samfelld viðskipti og uppboð hefst sem stendur yfir í 60-180 sekúndur. Tilboðabókin opnast aftur fyrir samfelld viðskipti eftir það.