Tekur áratug að endurbyggja íslenska myntsvæðið

Fimm til tíu ár tekur að endurbyggja íslenska myntsvæðið að mati sérfræðinga greiningardeildar Arion banka. Sérfræðingar bankans kynntu „Efnahagshorfur að hausti" á fundi á föstudag.

Eigi að takast að endurbyggja myntsvæðið segir Ásgeir Jónsson, forstöðumaður greiningardeildarinnar, að raungengi þurfi að vera lágt og afgangur á viðskiptum við útlönd. Þá þurfi ríkisfjárlög að skila afgangi og einkaneysla að vera lítil. Um leið sé nauðsynlegt að fá aftur aðgang að erlendum fjármálamörkuðum og laða að erlendar fjárfestingar. „Staðreyndin er að hér á landi hefur aldrei verið ráðist í neinar stærri framkvæmdir án þess að til kæmi erlent fjármagn," segir hann.

Um leið bendir Ásgeir á að innganga í Evrópusambandið og upptaka evru myndi gera ferlið allt auðveldara og kostnaðarminna. Þrátt fyrir allt þá segir Ásgeir stöðu Íslands samt að sumu leyti betri en annarra landa í Evrópu því við vitum hvar við stöndum. „Það er búið að skrifa niður eignir bankanna og endurfjármagna þá," segir hann og kveður að lán hafi verið í óláni að hve miklu leyti þeir voru fjármagnaðir í útlöndum. „Það er búið að klippa af stóran hluta af erlendum skuldum landsins."

Ásgeir bendir á að hér hafi peningamagn í umferð fjórfaldast frá árinu 2003. Til þess að koma þessu fjármagni í vinnu verði að byggja upp virkan eignamarkað. Bankarnir verði því að skrá fyrirtæki í þeirra eigu í Kauphöllina. Þar sé líka réttur vettvangur fyrirtækja til að sækja sér rekstrarfé.

Í hagspá bankans kemur fram að efnahagsbati verði veikur, enda fyrirséð að hagvöxtur verði undir langtímahagvexti út spátímabilið sem nær til ársins 2013. Þannig kom fram í máli Ásdísar Kristjánsdóttur, hagfræðings greiningardeildar, að tafir á orkuframkvæmdum hafi þegar sett strik í reikninginn. Spá bankans gerir ráð fyrir Búðarhálsvirkjun, en ekki öðrum orkutengdum verkefnum.- óká