Þurfa að sækja fé á lánsfjármarkað

Stefnubreyting og aðhald hjá Orkuveitu Reykjavíkur eftir meirihlutaskipti í borginni þarf ekki að þýða breytingar hjá Gagnaveitu Reykjavíkur, dótturfélagi Orkuveitunnar.

Þess er beðið að ný stjórn verði skipuð yfir Gagnaveituna, en ekki hafa fengist svör hjá forstjóra Orkuveitunnar um hvenær til standi að skipa hana. Ingvar Garðarsson, fráfarandi stjórnarformaður, segist ekki gera ráð fyrir að gamla stjórnin komi saman á ný. Aðalfundur hefur verið boðaður næstkomandi föstudag.

Birgir Rafn Þráinsson, framkvæmdastjóri Gagnaveitu Reykjavíkur, segir að í seinni tíð hafi orðið til þokkaleg samstaða um verkefni Gagnaveitunnar. Hann segir tekjur af starfseminni umtalsverðar og aukast jafnt og þétt með örri fjölgun viðskiptavina.

„Segja má að við séum í miðri á í uppbyggingarstarfi, en frá 2005 erum við búin að ljósleiðaravæða tugþúsundir heimila," segir Birgir, en áætlanir Gagnaveitunnar gera ráð fyrir að lokið verði við að ljósleiðaravæða stóran hluta höfuðborgarsvæðisins árið 2014.

Orkuveita Reykjavíkur á allt hlutafé Gagnaveitunnar, en eftir ákvörðun Póst- og fjarskiptastofnunar árið 2006 um fjárhagslegan aðskilnað, var ákveðið að stofna sérfélag um reksturinn. Birgir segir Gagnaveituna því á annarri bylgjulengd en Orkuveitan, með eigin fjármögnun, tekjustrauma og viðskiptalíkan. „Sparnaður í rekstri Gagnaveitunnar myndi ekki skila sér inn í rekstur Orkuveitunnar, því við tilheyrum ekki þeim rekstrarreikningi," segir hann og kveður ekkert gefa tilefni til að ætla að uppstokkun verði á stefnu Gagnvaveitunnar. „En auðvitað er það hlutverk stjórnar að móta stefnu hverju sinni."

Birgir segist ekki vilja fara í þaula í tímasetningar tengdar fjármögnun Gagnaveitunnar. Fyrirtækið hafi þó ekki sóst eftir langtímafjármögnun á þeim kjörum sem í boði voru á almennum lánsfjármarkaði í fyrra. Gagnaveitunni hafi þó verið tekið vel af lánveitendum og haft tiltrú þeirra. Fyrirtækið þurfi hins vegar að endurfjármagna lán sín og bæta við á framkvæmdatímanum sem eftir er.

„Reksturinn skilar vissulega góðri afkomu upp í fjárfestingar, en eins og alltaf þegar byggðir eru upp stórir nýir innviðir þá þarf miklu meira en reksturinn skilar af sér strax í upphafi. Við höldum því áfram að sækja til almenna lánsfjármarkaðarins, bæði hvað varðar ný lán og endurfjármögnun og eigum von á að fá þar góðar viðtökur." olikr@frettabladid.is