Forstjóri Capacent segir yfirtökuna vera kennitöluflakk

Fréttablaðið greindi frá því í morgun að hópur starfsmanna Capacent á íslandi hafi tekið yfir rekstur félagsins.

Ingvi Þór Elliðason, forstjóri Capacent, segir að ákveðið hafi verið að grípa til þessara aðgerðar eftir að ekki náðist samkomulag við Íslandsbanka um niðurfærslu á erlendu láni. Félagið tók 700 milljóna króna lán í erlendri mynt árið 2007 en það hefur hækkað verulega síðan þá.

„Staðan var orðin þannig að þetta var orðið óraunhæft og ógjörningur fyrir okkur að standa í skilum með þessi lán. Svo vorum við búnir að vera í viðræðum við bankann í 18 til 20 mánuði og leita leiða til að semja um lækkun á þessu láni gegn því að koma inn með nýtt fé en þær viðræður skiluðu ekki árangri því miður," segir Ingvi.

Ingvi segir að bankinn hafi í raun þvingað starfsmenn til að grípa til þessara aðgerða. Markmiðið sé að bjarga verðmætum, þar á meðal störfum, en hið nýja félag tekur yfir allar skuldbindingar gagnvart starfsmönnum og viðskiptavinum. Ekki stendur til að segja upp starfsfólki.

Er bankinn búinn að fallast á þessar ráðstafanir? „ Ja, þetta var í raun sú leið sem bankinn þvingar okkur í. Þanig að við fengum bara aðila til að meta þessa eign og það er einu sinni þannig í svona fyrirtæki að við erum ekki með fasteignir eða efnislegar eignir þannig að verðmætin eru fyrst og fremst í höfðinu á fólki," segir Ingvi.

Er þetta ekki bara hið sígilda kennitöluflakk? „Jú það má segja. Auðvitað erum við að skipta um kennitölu en ég vil ekki meina að þetta sé hið sígilda. Við erum ekki að skila eftir okkur birgja eða viðskiptamenn í sárum.. Það er bara þetta eina lán sem að situr eftir og allt annað í skilum. Skattar og gjöld og reikningar sem við höfum verið að stofna til að undanförnu," segir Ingvi.