Framtíðin óráðin hjá Favre

Hinn fertugi Brett Favre, leikstjórnandi Minnesota Vikings, vildi ekki gefa það út eftir tapið gegn New Orleans í nótt hvort hann væri loksins hættur í boltanum.

Það er líka eins gott því það hefði líklega enginn tekið mark á orðum hans á þeim tíma miðað við fyrri yfirlýsingar.

„Ég vil alls ekki taka ákvörðun strax eins og staðan er nákvæmlega núna," sagði Favre eftir leikinn og vildi lítið tjá sig um málið.

Eigendur Vikings eru þó taldir vilja halda Favre áfram og eru sagðir til í að hækka laun hans verulega svo hann spili eitt tímabil í viðbót enda sýndi hann í vetur að hann getur vel spilað bolta áfram í hæsta gæðaflokki.