Höfuðstólslækkun á eignaleigusamningum fyrirtækja

Frá og með 27. janúar geta fyrirtæki og einstaklingar í rekstri sem eru í viðskiptum við Íslandsbanka Fjármögnun fengið lækkun á höfuðstól eignaleigusamninga í erlendri mynt. Lækkunin getur numið allt að 25% og er breytileg eftir samsetningu mynta í hverjum samningi.

Í tilkynningu segir að um leið er samningnum breytt úr erlendri mynt í íslenskar krónur með breytilegum óverðtryggðum vöxtum. Íslandsbanki var fyrsti bankinn til að bjóða uppá höfuðstólsleiðréttingar fyrir einstaklinga bæði á íbúðarlánum og bílafjármögnun. Næsta skref er að bjóða fyrirtækjum og rekstraraðilum viðlíka úrræði, og er þetta fyrsti áfanginn í því ferli.

Höfuðstólslækkun á eignaleigusamningum felur í sér að:

Höfuðstóllinn lækkar og færist um leið í íslenskar krónur með breytilegum óverðtryggðum vöxtum

Vaxtakjörin eru 12,1% breytilegir vextir en veittur er 2,6 prósentustiga afsláttur af vöxtum fyrsta árið og verða þeir því 9,5% miðað við núverandi vaxtakjör Íslandsbanka Fjármögnunar.

Í flestum tilfellum lækka greiðslur við höfuðstólslækkun. Hægt er að lækka greiðslur enn frekar með því að lengja samninginn um ¾ af eftirstöðvatíma samningsins þó að hámarki um 36 mánuði.

Hægt verður að sækja um höfuðstólslækkun í gegnum vef bankans www.islandsbanki.is/fjarmognun. Skilyrði fyrir höfuðstólslækkun er að viðkomandi samningur sé í skilum.

„Við höfum frá því í nóvember síðastliðnum boðið einstaklingum höfuðstólslækkun á bílasamningum og bílalánum í erlendri mynt ásamt öðrum úrræðum fyrir viðskiptavini í greiðsluerfiðleikum," segir Ingvar Stefánsson, yfirmaður Íslandsbanka Fjármögnunar í tilkynningunni.

„Um 3.500 viðskiptavinir hafa nýtt sér þessi úrræði og þar af eru um 2.500 sem hafa sótt um höfuðstólslækkun, sem sýnir að þetta er úrræði sem nýtist mörgum mjög vel. Fjölmörg fyrirtæki og einstaklingar í rekstri eru með eignaleigusamninga í erlendri mynt hjá Íslandsbanka Fjármögnun og því er það von okkar að þessi lausn nýtist breiðum hópi viðskiptavina. Í raun má segja að lausnin sé tvíþætt því hún bæði lækkar höfuðstól og greiðslubyrði."