Geysir Green Energy selur hlut sinn í bandarísku jarðhitafélagi

Geysir Green Energy (Geysir), hefur selt hlut sinn í bandaríska jarðhitafélaginu Ram Power Corp. Salan er hluti af markvissri áætlun til að stuðla að lækkun skulda félagsins samkvæmt tilkynningu frá félaginu.

Með viðskiptunum losar Geysir allan hlut sinn í jarðhitafélaginu Ram Power Corp (TSX: RGP) sem er á hlutabréfamarkaði í Toronto, Kanada en félagið er með höfuðstöðvar í Reno í Nevada fylki í Bandaríkjunum.

Söluverðmæti bréfanna er um 11 milljónir kanadískra dollara. Salan er tengd ákvörðun stjórnar Geysis í samráði við viðskiptabanka félagsins frá því í lok 2009 að vinna markvisst að lækkun skulda félagsins með sölu eigna þess á næstu misserum.

Ram Power Corp. er jarðhitafélag sem vinnur að uppbyggingu og rekstri jarðhitavirkjana til raforkuframleiðslu í Norður- og Suður-Ameríku. Geysir varð kjölfestufjárfestir í Ram Power Inc. í nóvember 2008 stuttu eftir stofnun þess.

Í október 2009 sameinaðist Ram Power Inc. þremur öðrum kanadískum jarðhitafélögum og var stuttu síðar sett á markað í Kanada. Heildarverðmæti félagsins á markaði í dag er um 450 milljónir kanadískra dollara.