Kauphöllin: Heildarviðskipti rúmir 187 milljarðar í janúar

Heildarviðskipti með hlutabréf í janúar mánuði námu rúmum 3.493 milljónum eða 184 milljónum á dag að því er fram kemur í tilkynningu frá kauphöll. Heildarviðskipti á íslenska markaðnum öllum námu rúmum 187 milljörðum í janúr. Til samanburðar var veltan með hlutabréf í desembermánuði rúmar 3.163 milljónir, eða 150 milljónir á dag.

„Mest voru viðskipti með bréf Føroya Banki 2.627 milljónir og með bréf Össurar 502 milljónir. Markaðsvirði skráðra félaga var 199 milljarðar í lok síðasta mánaðar og lækkaði um 4% á milli mánaða. Markaðsvirði bréfa Össurar nam rúmum 72 milljörðum og er það félag stærst að markaðsvirði skráðra félaga. Næst í stærð er Marel en markaðsvirði þess nemur rúmum 43 milljörðum og bréf Føroya Banki en markaðsvirði þess er rúmir 31 milljarðar," segir í tilkynningunni.

Úrvalsvísitalan (OMXI6) lækkaði um 1,0% milli mánaða og stendur nú í 806,6 stigum. Af atvinnugreinavísitölum hækkaði vísitala heilbrigðisgeira (IX35PI) mest eða 3,6%.

Á Aðalmarkaði Kauphallarinnar var Saga Capital með mestu hlutdeildina 80,5% (16,2% á síðasta ári), Arion Banki með 8,5% (28,1% á síðasta ári) og NBI með 2,3% (12,5% á síðasta ári).

Heildarviðskipti með skuldabréf námu rúmum 184 milljörðum í síðasta mánuði sem samsvarar 9,7 milljarða veltu á dag. Í desembermánuði nam veltan 9,3 milljörðum á dag. Mest voru viðskipti með lengri flokka ríkisbréfa, RIKB 25 0612 37 milljarðar og þá með RIKB 19 0226 30 milljarðar. Alls námu viðskipti með ríkisbréf 113,9 milljörðum en viðskipti með íbúðabréf námu 63,6 milljörðum. Heildarmarkaðsvirði skráðra skuldabréfa nam rúmum 1.361 milljörðum og hækkaði um 0,1% milli mánaða.

Ávöxtunarkrafa þriggja mánaða óverðtryggðu vísitölunnar (OMXI3MNI) hækkaði um 16 punkta í mánuðinum og stendur nú í 7,79%. Ávöxtunarkrafa eins ára óverðtryggðu vísitölunnar (OMXI1YNI) lækkaði um 30 punkta og er núna 7,19% og krafa fimm ára óverðtryggðu vísitölunnar (OMXI5YNI) hækkaði um 13 punkta og stendur í 7,65%.

Hlutdeild kauphallaraðila á skuldabréfamarkaði - Í janúarmánuði var MP Banki með mestu hlutdeildina 35,7% (31,7% á síðasta ári), Íslandsbanki með 21,3% (27,6% á síðasta ári) og NBI með 15,2% (13,5% á síðasta ári).