Umfjöllun: Keflvíkingar skelltu Stjörnunni á jörðina

Keflavík vann í kvöld stórsigur á Stjörnunni í toppslag í Iceland Express-deild karla, 118-83.

Mestu munaði um ótrúlega byrjun Keflavíkur í síðari hálfleik þar sem liðið skoraði 22 stig í röð og komst mest í 39 stiga forystu, í stöðunni 83-44.

Stjörnumenn byrjuðu þó ágætlega í leiknum og pössuðu sig á því að missa heimamenn ekki of langt frá sér. En þegar að Justin Shouse var hvíldur í öðrum leikhluta gengu Keflvíkingar á lagið með 14-0 spretti. Þeir létu forystuna aldrei af hendi eftir það.

Keflvíkingar spiluðu mjög fastan varnarleik í kvöld og létu Stjörnumenn finna vel fyrir sér. Garðbæingar áttu einfaldlega ekki svar við því og munurinn orðinn það stór snemma í síðari hálfleik að sigur Keflvíkinga var aldrei í hættu.

Bandaríkjamaðurinn Draelon Burns átti mjög góðan leik í kvöld og skoraði alls 30 stig fyrir Keflavík, þar af 20 í fyrri hálfleik. Gunar Einarsson fór einnig mikinn og setti niður sjö þriggja stiga körfur, þar af sex í síðari hálfleik. Alls skoraði hann 23 stig í leiknum.

Hörður Axel Vilhjálmsson átti mjög jafnan og góðan leik fyrir Keflavík og skilaði mjög flottum tölum - 22 stigum, sex stoðsendingum og fimm fráköstum.

Eins og gefur að skilja voru Stjörnumenn talsvert frá sínu besta en þeir Justin Shouse og Fannar Freyr Helgason fóru fyrir sínum mönnum eins og svo oft áður. Birgir Björn Pétursson átti reyndar ágæta innkomu undir lokin.

Stjörnumenn höfðu unnið fimm leiki í röð fyrir leikinn í kvöld og hófu nýja árið í toppsæti deildarinnar. Óhætt er að segja að Keflvíkingar hafi skellt þeim niður á jörðina í kvöld en Stjarnan féll niður í fjórða sæti deildarinnar með tapinu. Spennan á toppnum er þó áfram mikil og verður sennilega áfram.

Stig Keflavíkur: Draelon Burns 30, Gunnar Einarsson 23, Hörður Axel Vilhjálmsson 22, Jón Norðdal Hafsteinsson 9, Sverrir Þór Sverrisson 9, Gunnar Stefánsson 8, Sigurður Þorsteinsson 8, Elentínus Margeirsson 7, Þröstur Leó Jóhannsson 2.

Stig Stjörnunnar: Justin Shouse 21, Jovan Zdravevski 17, Fannar Freyr Helgason 14, Birgir Pétursson 11, Kjartan Atli Kjartansson 7, Magnús Helgason 6, Ólafur Ingvason 5, Birkir Guðlaugsson 2.