Yfirtaka Íslandsbanka á Eik samþykkt með skilyrðum

Fjallað er um málið á vefsíðu Samkeppniseftirlitsins. Meðal skilyrða sem yfirtökunni eru sett má nefna að Íslandsbanki skal selja eignarhluti sinn í Eik eins fljótt og verða má. Samkeppniseftirlitið getur framlengt sölufrest sæki bankinn um það. Í umsókn um framlengingu sölufrests skal rökstutt hvaða atvik komi í veg fyrir sölu.

Eignarhlutur Íslandsbanka skal seldur í fyrirfram skilgreindu og gagnsæju ferli, verði því við komið, t.d. með skráningu í kauphöll að undangengnu útboði í samræmi við ákvæði laga um verðbréfaviðskipti

„Markmið ákvörðunar þessarar er að tryggja að viðskiptatengsl Íslandsbanka við fyrirtæki sem starfa á sömu eða skyldum mörkuðum og Eik skaði ekki samkeppni á meðan Eik er undir yfirráðum Íslandsbanka. Skal bankinn í því skyni tryggja sjálfstæði Eikar á samkeppnismarkaði," segir á vefsíðunni.

Af öðrum skilyrðum má nefna að hlutafé það sem Íslandsbanki á í Eik skal komið fyrir í eignarhaldsfélagi í eigu bankans.

Eignarhaldsfélagið skal lúta eftirfarandi reglum að lágmarki:

Meirihluti stjórnar eignarhaldsfélagsins skal skipaður stjórnarmönnum sem eru óháðir Íslandsbanka. Aðrir stjórnarmenn mega ekki koma úr hópi starfsmanna á þeim sviðum bankans sem bera ábyrgð á útlánum til fyrirtækja.

Eik og fasteignir í eigu þess skulu seldar eins fljótt og verða má. Nú fellur Íslandsbanki frá því að selja félagið í einu lagi og skal þá gerð áætlun um sölu fasteigna í eigu eignarhaldsfélagsins.

Eik skal rekin sem sjálfstætt félag undir eignarhaldsfélaginu. Eignarhaldsfélagið skipar þá stjórn Eikar og skal stjórn félagsins vera óháð eignarhaldsfélaginu. Stjórnarmönnum og starfsmönnum Íslandsbanka eða öðrum aðilum sem teljast háðir bankanum er óheimilt að sitja í stjórn Eikar. Rekstur Eikar skal vera að fullu aðskilinn frá öðrum rekstri bankans og eignarhaldsfélagsins.

Íslandsbanki skal fela óháðum aðila eða aðilum eftirlit með því að skilyrðum ákvörðunar þessarar sé fylgt. Með óháðum aðila er hér átt við aðila sem ráðinn er af bankanum og kemur ekki með neinum hætti að framkvæmd skilyrða ákvörðunar þessarar eða starfsemi bankans eða eignarhaldsfélagsins sem tengist skilyrðum ákvörðunarinnar.

Eik var annað stærsta fasteignafélag hér á landi á eftir Landic Properties. Dótturfélög Eikar eiga t.a.m. ráðandi hlut í Smáralind, fasteignir Húsasmiðjunnar, fasteignir í Noregi og 55 fasteignir í miðborg Reykjavíkur, í póstnúmerunum 105 og 108 og víðar.

Fasteignirnar sem um ræðir eru t.d. Austurstræti 5, 7 og 17, Hafnarstræti 5,8 og 7 og Bankastræti 5.