Fjórir Prius innkallaðir á Íslandi

Innkalla þurfti fjórar bifreiðar af Toyota Prius gerð hér á Íslandi en alls þarf  Toyota að innkalla 52.903 bíla í Evrópu vegna uppfærslu sem gera þarf á hugbúnaði í ABS-bremsukerfi bílsins. Páll Þorsteinsson upplýsingafulltrúi Toyota segir að þessi gerð af Prius hafi verið kynnt hér á landi í september og að fjórir bílar hafi selst. Þegar hefur verið haft samband við eigendur þeirra bíla sem kalla þarf inn hér á landi og gefa þeim tíma á verkstæði.

Viðgerðin er framkvæmd vegna tilkynninga um óstöðuga hemlunartilfinningu við jafna en ákveðna hemlun á lausu vegyfirborði þegar ABS hemlastýrikerfið yfirtekur hemlastjórnunina. Viðgerðin felst í uppfærslu á forriti í ABS stjórntölvu. Uppfærða forritið flýtir innkomu ABS stjórnunarinnar þegar hemlað er á lausu vegyfirborði.

Engin slys hafa orðið í Evrópu vegna þessa svo vitað sé. Innköllunin á ekki við um eldri gerðir Prius, aðrar gerðir af Toyota eða Lexus.