Eurostat mælir 4,6% verðbólgu hér á landi

Verðbólgan hér á landi var 4,6% í október samkvæmt samræmdri vísitölu neysluverðs sem Hagstofa Evrópusambandsins (e. Eurostat) tekur saman og birti nú í morgun. Minnkar því verðbólgan um 0,5 prósentustig milli mánaða en hún var 5,1% hér á landi í september samkvæmt vísitölunni.

Fjallað er um málið í Morgunkorni greiningar Íslandsbanka. Þar segir að á þennan mælikvarða hefur verðbólgan hjaðnað umtalsvert síðasta árið en í október í fyrra mældist hún 13,8%. Meginástæða hjöðnunar verðbólgunnar er að áhrif gengislækkunar krónunnar á verðbólgu sem varð í aðdraganda og samhliða hruni bankakerfisins hér á landi á árinu 2008 eru nú nær horfin og tekin eru við áhrif styrkingar krónunnar frá upphafi árs.

Á sama tíma og verðbólga minnkar hér á landi eykst hún í flestum öðrum ríkjum Evrópska efnahagssvæðisins (EES). Þannig var verðbólgan að meðaltali 2,3% í ríkjum EES nú í október en hafði verið 2,2% mánuðinn á undan. Verðbólgan er nokkuð minni ef tekið er mið af ríkjum evrusvæðisins, en þar mældist verðbólgan 1,9% í október en hafði verið 1,8% í september.

Á milli mánaða eykst verðbólgan mest í prósentustigum talið í Finnlandi, en þar fór hún úr 1,4% í 2,3%. Mest dregur úr verðbólgu milli mánaða hér á landi og svo á Grikklandi þar sem verðbólgan fór úr 5,7% í 5,2%. Engu að síður mældist verðbólgan í októbermánuði næstmest á Grikklandi og þriðja mest hér á landi en mest er hún í Rúmeníu, eða um 7,9%.

Aðeins Írland upplifði ástand verðhjöðnunar í október, en þar hefur samræmd vísitala lækkað um 0,8% á síðustu tólf mánuðum. Ekki er við öðru að búast miðað við verðbólguhorfur hér á landi en að munurinn á Íslandi og öðrum ríkjum EES haldi áfram að minnka næsta kastið.