Forsætisráðherra hefur íhugað að segja sig úr Þjóðkirkjunni

Jóhanna Sigurðardóttir forsætisráðherra hefur íhugað að segja sig úr Þjóðkirkjunni. Þetta sagði hún við fréttamenn eftir ríkisstjórnarfund í dag. Jóhanna vildi ekki svara því hvort þessar íhuganir hennar væru tilkomnar vegna nýjustu tíðinda af Þjóðkirkjunni.

Eins og flestum er kunnugt hafa kynferðisbrot innan kirkjunnar verið mikið til umræðu eftir að dóttir Ólafs Skúlasonar, fyrrverandi biskups, lýsti alvarlegum kynferðisbrotum hans gegn sér fyrir Kirkjuráði í síðustu viku. Þá sagði Geir Waage, sóknarprestur í Reykholti, að þagnarskylda presta væri fremri tilkynningaskyldu sem kveðið er á um í barnaverndalögum.

Forsætisráðherra og Steingrímur J. Sigfússon fjármálaráðherra voru sammála um að stefna bæri að frekari aðskilnaði ríkis og kirkju.