Settu nýtt aflamet smábáta

Þriggja manna áhöfn á hraðfiskibátnum Tryggva Eðvalds SH frá Rifi á Snæfellsnesi, setti í gær nýtt aflamet smábáta á einum mánuði, og það svo um munaði.

Að sögn Arnars Laxdal Jóhannssonar skipstjóra í viðtali við Fréttastofuna í morgun var aflaverðmætið 74 milljónir króna, sem áhafnarmeðlimirnir þrír báru að landi í mánuðinum. Arnar tekur fram að sex beitningarmenn í landi standi líka að baki metsins, en línan er beitt í landi. Tryggvi Eðvalds er aðeins ellefu tonn að stærð, og ekki yfirbyggður.

Fyrra aflamet hraðfiskibáts mun vera 43 milljónir á einum mánuði þannig að áhöfnin á Tryggva Eðvalds bætti metið um rúmar 30 milljónir króna. Uppistaða aflans var þorskur.-