Afgangur af vöruskiptum eykst um 44% milli ára

Á fyrstu ellefu mánuðum ársins nemur afgangur af vöruskiptum 108,9 milljörðum kr. sem jafngildir aukningu upp á rúm 44% á föstu gengi frá sama tímabili fyrir ári.

Fjallað er um málið í Morgunkorni greiningar Íslandsbanka. Þar segir að þannig hafi vöruútflutningur aukist um tæp 15% á tímabilinu reiknað með þessum hætti á sama tíma og vöruinnflutningur hefur aukist um tæp 9%.

Hvað útflutning varðar þá skýrist þessi aukning einna helst af auknum tekjum af útfluttum iðnaðarvörum en útflutningsverðmæti þeirra er ríflega þriðjungi meira en á sama tímabili í fyrra, sé leiðrétt fyrir gengisbreytingum. Sem kunnugt er má rekja þessa þróun að stærstum hluta til verðhækkunar á áli á heimsmarkaði á tímabilinu.

Skýring á auknum innflutningi liggur að mestu í að innflutningur á hrá- og rekstrarvörum er um fimmtungi meiri nú en á sama tíma í fyrra á föstu gengi og innflutningur fjárfestingavara um 62% meiri. Á hinn bóginn hefur innflutningur flutningatækja dregist saman um 39% á tímabilinu og er eini liðurinn, að innfluttum vörum ótilgreindum annars staðar undanskildum sem dregist hefur töluvert saman á tímabilinu.

Greiningin segir að telja megi nokkuð víst að um metafgang af vöruskiptum verði að ræða í ár. Þannig er útlit fyrir að hann muni verða á bilinu 115-125 milljarðar kr. og verði það raunin þá hefur hann ekki verið meiri í a.m.k. tvo áratugi, eða eins langt aftur og tölur Hagstofu ná. Í fyrra nam vöruskiptaafgangurinn 6% af vergri landsframleiðslu (VLF) en nú stefnir í að hann verði um 7-8% af áætlaðri VLF ársins.