Langtímaatvinnuleysi hefur þrettánfaldast á einu ári

Þetta segir í Morgunkorni greiningar Íslandsbanka þar sem gluggað er í nýjustu tölur um atvinnuleysið frá Vinnumálastofnun.

Greiningin segir að horfur eru á áframhaldandi fjölgun þessa hóps en 2.568 manns höfðu verið án atvinnu í 9 til 12 mánuði í lok desember. Þróun í þessa átt getur leitt til þess að erfiðara verður að vinda ofan af atvinnuleysinu þegar birtir til í efnahagslífinu, en að jafnaði fá þeir sem lengst hafa verið án atvinnu seinna vinnu en aðrir þegar atvinnuleysi fer minnkandi.

Í lok desember voru 15.329 einstaklingar atvinnulausir og líkt og undanfarna mánuði var um helmingur þeirra sem hafði verið atvinnulaus í 6 mánuði eða lengur.

Í desembermánuði bárust Vinnumálastofnun 5 tilkynningar um hópuppsagnir þar sem sagt var upp 167 manns og koma þær til framkvæmda á tímabilinu janúar til apríl. Er nú áætlað að um 113 manns muni missa vinnuna nú í janúar vegna hópuppsagna og 200 manns í febrúar.

Ekki er við öðru að búast en að atvinnuleysi haldi áfram að aukast á næstunni, þá hvort tveggja vegna árstíðarsveiflu og vaxandi slaka í hagkerfinu. Yfirleitt versnar atvinnuástandið frá desember til janúar og samkvæmt Vinnumálastofnun benda nýskráningar fyrstu daganna í janúar til að svo verði raunin einnig í ár.

Áætlar stofnunin að atvinnuleysi komi til með að verða á bilinu 8,6%-9,1% nú í janúar. Má því gera ráð fyrir að atvinnuleysi komi til með að aukast á næstu mánuðum og reiknum við með að það hámarki í mars/apríl 2010.