NBA í nótt: Boston komið í 3-0

Paul Pierce tryggði Boston dramatískan sigur á Miami, 100-98, með flautukörfu í úrslitakeppni NBA-deildarinnar í nótt. Boston er þar með komið í 3-0 í einvíginu.

Margir höfðu spáð því að Boston myndi lenda í vandræðum í úrslitakeppninni þar sem liðið hefur átt í miklu basli síðari hluta vetrarins.

„Boston er byrjað að spila vel," sagði miðherjinn Kendrick Perkins eftir leikinn.

Boston hefur þó ekki átt í miklum vandræðum með Miami í gegnum tíðina og unnið fjórtán af síðustu fimmtán leikjum sínum gegn liðinu.

Dwayne Wade skoraði 34 stig fyrir Miami í leiknum en það dugði ekki til. Michael Beasley var með sextán stig og Dorell Wright með fimmtán.

Það hefur þó munað miklu fyrir Miami að Jermaine O'Neal hefur engan veginn fundið sig. Hann skorði tvö stig í leiknum í nótt og er alls með sextán prósent skotnýtingu í seríunni til þessa.

Paul Pierce átti frábæran leik og skoraði 32 stig. Ray Allen skoraði 25 stig, annan leikinn í röð og Rajon Rondo var með sautján stig og átta stoðsendingar.

Utah vann Denver, 105-93, á heimavelli sínum og tók þar með forystuna í einvíginu, 2-1.

Utah hefur verið að glíma við mikil meiðsli í sínum herbúðum og því var sigurinn í nótt sérstaklega sætur fyrir liðið.

Leikmenn eins og Paul Millsap hafa verið að nýta tækifærið vel en hann skoraði 22 stig og tók nítján fráköst í leiknum í nótt. Hann klikkaði ekki á skoti í fyrri hálfleik og skoraði þá átján stig.

Deron Williams átti stórleik og skoraði 24 stig og gaf tíu stoðsendingar fyrir Utah. Carlos Boozer var með átján.

Carmelo Anthony og Chauncey Billups skoruðu 25 stig hvor fyrir Denver.

Þá vann San Antonio góðan sigur á Dallas á heimavelli sínum, 94-90, og er komið í 2-1 forystu í einvíginu.

Skipti engu að Manu Ginobili nefbrotnaði í þriðja leikhluta - hann kom aftur eftir fimm mínútna fjarveru og átti ríkan þátt í því að San Antonio kláraði leikinn. Hann skorði ellefu stig í fjórða leikhluta en alls var hann með fimmtán stig í leiknum.

Tim Duncan var með 25 stig og Tony Parker 23 stig. Dirk Nowitzky skoraði 35 stig fyrir Dallas í leiknum og Jason Terry sautján.