NBA: Cleveland tryggði sér toppsætið

LeBron James skoraði 32 stig í sigri Cleveland Cavaliers á Indiana Pacers í nótt 99-94. Með þessum sigri tryggði Cleveland sér sigur í Miðdeild NBA-deildarinnar annað árið í röð.

Philadelphia 76ers batt enda á fimm leikja taphrinu með 108-97 sigri á New Jersey Nets. Mestu munaði um framlag Andre Iquodala sem skoraði 20 stig og fann taktinn aftur eftir að hafa ollið miklum vonbrigðum að undanförnu.

Chris Bosh átti ekki góðan leik fyrir Toronto Raptors sem vann Atlanta Hawks 106-105. Hann reyndist þó hetja leiksins með því að skora sigurkörfuna þegar tvær sekúndur voru eftir. Andrea Bargnani skoraði 22 stig fyrir Toronto.

Michael Jordan er orðinn eigandi Carlotte Bobcats sem vann Oklahoma City Thunder 100-92. Lykilmaðurinn í þeim sigri var Stephen Jackson sem skoraði 18 af 20 stigum sínum í seinni hálfleik.

Paul Pierce skoraði 29 stig fyrir Boston Celtics sem vann New York Knicks 109-97. Vince Carter skoraði 24 stig fyrir Orlando Magic sem vann San Antonio Spurs 110-84.

Chicago Bulls tapaði sínum níunda leik í röð, nú gegn Dallas Mavericks. Aaron Brooks skoraði 31 stig fyrir Houston Rockets sem vann Memphiz Grizzlies 107-94.

Utah Jazz átti í vandræðum með Minnesota Timberwolves framan af leik en gestirnir urðu síðan bensínlausir í lokin og Utah vann 122-100. Golden State Warriors vann New Orleans Hornets með tíu stiga mun.

Þá vann Los Angeles Clippers 101-93 sigur á Milwaukee Bucks eftir að hafa tapað átta leikjum í röð. Milwaukee hafði hinsvegar unnið sex í röð þegar kom að þessum leik.

Úrslit næturinnar:

Charlotte - Oklahoma 100-92

Cleveland - Indiana 99-94

Toronto - Atlanta 106-105

Boston - New York 109-97

Orlando - San Antonio 110-84

Dallas - Chicago 113-106

Houston - Memphis 107-94

Utah - Minnesota 122-100

Golden State - New Orleans 131-121

LA Clippers -Milwaukee 101:93