Arion banki segir kyrrstöðusamninga daglegt brauð

Arion banki hefur tímabundið fryst lán hjá hundruðum viðskiptavina sinna, einstaklingum sem fyrirtækjum, á undanförnum mánuðum, segir í tilkynningu frá fyrirtækinu. Það er í samræmi við skýringar aðstandenda fjárfestingarfélagsins Gaums.

Arion banki segir í tilkynningu að hann leiti allra leiða til að tryggja hagsmuni sína sem kröfuhafa í málefnum sem snerti fjárfestingarfélagið Gaum, sem og öðrum málum. Kyrrstöðusamningar séu í ákveðnum tilvikum leið til að verja slíka hagsmuni og þeir séu í eðli sínu tímabundin frysting lána meðan unnið sé að greiningu og úrlausn vanda viðkomandi fyrirtækis.

Arion banki segist hafa tímabundið fryst lán hjá hundruðum viðskiptavina sinna, einstaklingum sem fyrirtækjum, að undanförnu. Í öllum þessum tilvikum vænti bankinn þess að eitthvað gerist áður en fresturinn sé úti sem verði til þess að bankinn sjái hagsmunum sínum betur borgið sem kröfuhafi. Kyrrstöðusamningar séu gerðir til nokkurra daga, vikna eða til lengri tíma og að fjöldi slíkra samninga hafi verið gerðir að undanförnu þar sem einn kröfuhafi eða fleiri saman gefa skuldurum færi á að endurskipuleggja fjármál sín. Umræða um að kyrrstöðusamningar feli sér sérkjör fyrir útvalda sé því villandi. Arion banki segir að aðgerðir í einstökum málum séu háðar mati hverju sinni með hagsmuni bankans að leiðarljósi. Og þó að einn kröfuhafi geri kyrrstöðusamning hafi það ekki áhrif á fullnustuaðgerðir annarra kröfuhafa.

Þá hyggst bankinn óska eftir fundi með embætti umboðsmanns skuldara til að fara yfir þessi mál vegna ummæla umboðsmanns, en Ásta Sigrún Helgadóttir, umboðsmaður skuldara, greindi frá því í kvöldfréttum Stöðvar 2 í gær að hún hygðist óska eftir skýringum hjá bæði Landsbankanum og Arion banka vegna frétta af samningum sem fjárfestingarfélagið Gaumur og Björgólfur Thor Björgólfsson hefðu gert við innlenda lánardrottna sína.

Fjárfestingarfélagið Gaumur er móðurfélag eignarhaldsfélagsins 1998 ehf. sem var móðurfélag Haga, en 1998 ehf. skuldar Arion banka á fimmta tug milljarða króna með gengisbreytingu krónunnar vegna yfirtöku á Högum frá árinu 2008 þegar félagið var selt út úr Baugi Group.

Jón Ásgeir Jóhannesson, einn eigenda Gaums og 1998 ehf., er kvæntur Ingibjörgu Pálmadóttur, stærsta hluthafa 365 miðla sem eiga og reka fréttastofu Stöðvar 2 og Vísis.