FME þegir þunnu hljóði um Fons

Gunnar Þ. Andersen, forstjóri Fjármálaeftirlitsins, vill ekkert tjá sig um það hvort verið sé að rannsaka milljarða lánveitingar Glitnis til eignarhaldsfélagsins Fons vikurnar fyrir bankahrunið. Glitnir gerði lánasamninga og samninga um framvirk hlutabréfaviðskipti við Fons upp á samtals 7,2 milljarða króna rétt fyrir hrun bankans.

Glitnir gerði lánasamninga við Fons upp á samtals 7,2 milljarða króna rétt fyrir hrun bankans, að því er fram kemur í gögnum sem Vilhjálmur Bjarnason, sem var hluthafi bankans, fékk afhent í síðustu viku. Vilhjálmur sagði í samtali við fréttastofu í síðustu viku að gögnin sýni stjórnendur bankans hafi verið að ausa peningum út í tóma vitleysu á sama tíma og þeir þóttust vera að reyna að bjarga honum.

Um er að ræða samnina sem gerðir eru á tímabilinu 5. september til 8. október 2008, síðustu vikurnar fyrir hrun bankans en síðasti samningurinn er samningur um framvirk hlutabréfaviðskipti daginn eftir að Glitnir var tekinn yfir af Fjármálaeftirlitinu.

Morgunblaðið varpaði fram spurningu í leiðara blaðsins í gær um hvort einhver væri að rannsaka þessar lánveitingar og sagði þær siðlausar og löglausar. Gunnar Þ. Andersen, forstjóri Fjármálaeftirlitsins, segist ekki geta tjáð sig um hvort verið sé að rannsaka lánveitingarnar.

Nú hefur komið fram í dagsljósið að það fóru milljarðar út úr Glitni banka síðustu vikurnar fyrir bankahrunið til eignarhaldsfélagsins Fons, sem var nátengt stærsta hluthafa bankans. Er Fjármálaeftirlitið að rannsaka þetta?

„Ég vildi að ég gæti svarað þér, en ég verð að gefa þetta sama leiðinlega svar ég get ekki tjáð mig um einstök mál eða einstaklinga sem gætu verið í rannsókn eða sæta ekki rannsókn," segir Gunnar Þ. Andersen.

Er samt ekki eðlilegt að rannsaka þetta í ljósi þess að það fóru milljarðar til félagsins rétt fyrir hrunið? „Það þarf ekki að vera. Þetta getur verið eðlilegur flutningur, eins og hann getur verið óeðlilegur," segir Gunnar.