Landsbankinn býður 25% lækkun á höfuðstól erlendra lána

Þetta kemur fram á vefsíðu Landsbankans. Þar segir að bankinn býður nú fyrirtækjum sem tekið hafa lán í erlendri mynt að sækja um höfuðstólslækkun sem nemur 25% af höfuðstól láns, gegn því að láni sé breytt í verðtryggð eða óverðtryggð lán í íslenskum krónum. Í útreikningi á lækkun höfuðstóls verður miðað við stöðu lána þann 30. apríl 2010.

Jafnframt hefur bankaráð bankans samþykkt aðrar aðgerðir til stuðnings fyrirtækjum í landinu sem eiga að verða til þess að hraða mjög úrvinnslu skuldamála fyrirtækja. Samanlagt mynda þessar nýjungar bankans, auk þeirra breytinga sem gerðar eru á eldri lausnum, öfluga umgjörð um lausnir fyrir fyrirtæki og hraða mjög meðferð skuldbreytinga þeirra.

Helstu kostir höfuðstólslækkunarinnar eru:

Skuldir lækka umtalsvert

Lán verða í tekjumyntum fyrirtækis

Greiðslubyrði verður jafnari

Dregur úr gengis- og vaxtaáhættu

Öll rekstrar- og fasteignafélög sem tóku lán í erlendri mynt fyrir 8. október 2008 geta sótt um lækkunina. Þetta er tímabundið úrræði og verður í boði til 30. júlí.

Landsbankinn kynnir einnig nýjar og endurbættar lausnir vegna skuldavanda einstaklinga og heimila. Þær breytingar sem gerðar hafa verið miða að því að einfalda skuldabreytingar, hraða afgreiðslu mála og skerpa áherslur bankans á þessu sviði. Unnið hefur verið að endurbótum á lausnum bankans í ljósi þeirrar reynslu sem fengist hefur frá því þær voru innleiddar. Markmið bankans er að þjóna betur þörfum viðskiptavina þannig að þeir geti greitt úr vanda sínum hraðar og betur en fyrr.

Breytingar á reglum um höfuðstólsleiðréttingu lána í erlendri mynt. Afsláttur verður 25% á öll slík lán sem breytt er í íslenskar krónur, eða greidd upp, óháð lánstíma og nær til höfuðstóls og áfallinna vaxta.Hægt verður að greiðslujafna erlend lán sem tekin voru til annars en húsnæðiskaupa. Breyting á 110% aðlögun íbúðalána sem fækkar þeim sem þurfa að undirgangast sértæka skuldaaðlögun. Veruleg breyting til bóta fyrir þá sem sitja uppi með tvær eignir og geta ekki staðið undir greiðslubyrði af þeim báðum.

Afturvirk höfuðstólsleiðrétting gildir fyrir þá sem hafa greitt upp lán að hluta eða heild frá 8. október 2008 eða hafa fengið leiðréttingu á höfuðstól en með minni lækkun.

Fyrirtæki og einstaklingar sem nýta sér höfuðstólslækkun afsala sér ekki réttindum ef erlend lán verða dæmd ólögleg.