Gamalt Superman blað selt á milljón dollara

24. febrúar 2010 08:37

Í fyrsta sinn í sögunni hefur gamalt hasarmyndablað verið selt á eina milljón dollara eða tæplega 129 milljónir kr. Um er að ræða fyrsta tölublaðið um ofurhetjuna Superman undir nafninu Action Comics frá árinu 1938.

Í frétt um málið í blaðinu Daily Mail segir að fyrra metverð hafi einnig verið gefið fyrir annað eintak af fyrsta tölublaði af Action Comics eða 317.000 dollarar en það blað var í verra ásigkomulagi en það sem selt var núna. Á sínum tíma, árið 1938, kostuðu blöðin 10 sent.

Ekki er vitað um nema 100 eintök í heiminum af Action Comics No. 1 en það sem selt var á milljón dollara er eitt af örfáum sem eru í nær fullkomnu ásigkomulagi.

Blaðið var selt í gegnum upboðsvefinn Comic Connect og segir Stephen Fisher, annar eigandi vefsins, að Action Comics No. 1 sé...."hinn heilagi kaleikur hasarmyndablaðanna". Það gerist aðeins einu sinni á tuttugu ára fresti að slíkt blað komi á markaðinn. Kaupandinn vill hinsvegar ekki láta nafns síns getið en hann er þekktur hjá Comic Connect og hefur áður fest kaup á Action Comics No. 1.

Það fylgir sögunni að síðar á þessu ári mun fyrsta hasarmyndablaðið með hetjunni Batman verða boðið upp. Það blað er árinu yngra eða frá 1939. Hugsanlega mun það slá verðmet Superman.