Góðar líkur á 20 milljarða bónus úr sölunni á FIH bankanum

Góðar líkur eru á að salan á FIH bankanum muni gefa af sér um 20 milljörðum króna hærri upphæð en fram hefur komið í fréttum.

Í kaupsamningnum sem gerður var segir að Seðlabanki Íslands og skilanefnd Kaupþings muni fá ákveðna hlutdeild í fjárfestingarsjóðnum Axcel III í framtíðinni en FIH bankinn er einn af eigendum sjóðsins. Sá sjóður er nú 3,5 milljarðar danskra kr., eða yfir 70 milljarða kr. að stærð og hagnaðist um 1,9 milljarð danskra króna árið 2009.

Samkvæmt heimildum Fréttastofu mun hlutur Íslendinga í sjóðnum nema um milljarði danskra króna eða 20 milljörðum kr. ef allt fer sem horfir. Heildarsöluverðið fyrir FIH muni því nema allt að 123 milljörðum kr.

Fjallað hefur verið um málið á viðskiptavefsíðum danskra fjölmiðla en sjóðurinn sem hér um ræðir er stærsti eigandi skartgripaframleiðandans Pandóru.

Fyrir dyrum stendur að skrá Pandóru á markað í Kaupmannahöfn og reiknað er með að sú skrárning muni skila eigendum Pandóru milljörðum danskra króna í aðra hönd. Þannig telur greining Nordea bankans að markaðsvirði Pandóru sé ekki undir 25 milljörðum danskra króna eða yfir 500 milljörðum kr.