Sala á raftækjum jókst um 15% í desember

Mikil aukning varð í veltu raftækjaverslana í desember frá síðasta ári hvort sem mælt er á breytilegu eða á föstu verðlagi. Leita þarf aftur til mars 2008 til að finna jafn mikla veltu að raunvirði í raftækjaverslun.

Þetta kemur fram í nýjum tölum frá Rannsóknarsetri verslunarinnar um jólavertíðina hjá verslunum á síðasta ári.

Velta í dagvöruverslun jókst um 1,7% á föstu verðlagi í desember miðað við sama mánuð árið áður og jókst um 9,6% á breytilegu verðlagi. Leiðrétt fyrir árstíðabundnum þáttum nam aukning í veltu dagvöruverslana í desemer 3,1% frá sama mánuði árið áður. Verð á dagvöru hækkaði um 7,8% á síðastliðnum 12 mánuðum.

Sala áfengis minnkaði um 2,3% í desember miðað við sama mánuð árið áður á föstu verðlagi og jókst um 13,8% á breytilegu verðlagi. Leiðrétt fyrir árstíðabundnum þáttum nam samdráttur í veltu áfengis í desember 6,3% frá sama mánuði í fyrra. Verð á áfengi var 16,5% hærra í desember síðastliðnum en í sama mánuð í fyrra.

Fataverslun var 2,3% minni í desember miðað við sama mánuð árið áður á föstu verðlagi en jókst um 13,1% á breytilegu verðlagi á sama tímabili. Verð á fötum var 18,5% hærra í desember síðastliðnum en í sama mánuði ári fyrr.

Velta skóverslunar jókst um 2,0% í desember á föstu verðlagi og um 22,7% á breytilegu verðlagi miðað við sama mánuð í fyrra. Verð á skóm hækkaði í desember um 20,3% frá desember í fyrra.

Velta húsgagnaverslana var 1,1% minni í desember en í sama mánuði í fyrra á föstu verðlagi og 23,5% minni á breytilegu verðlagi. Verð á húsgögnum var 11,9% hærra í desember síðastliðnum miðaða við sama mánuð í fyrra.

Þá er athyglisvert að aukning varð í veltu dagvöruverslunar í desember síðastliðnum frá sama mánuði ári áður. Hér er um raunaukningu að ræða á milli ára því þegar bæði hefur verið tekið tillit til verðlagsbreytinga á tímabilinu og leiðrétt fyrir daga- og árstíðabundnum þáttum nam veltuaukningin 3,1% en slík aukning á milli ára hefur ekki orðið síðan um mitt ár 2008. Þó ber að hafa í huga í þessum samanburði að jólaverslun í fyrra dróst mikið saman frá fyrri árum.

Jólaverslun með föt dróst hins vegar saman bæði í nóvember og desember frá sama tímabili í fyrra á föstu verðlagi en skóverslun jókst báða þessa mánuði. Greinilegt er að landsmenn hafa dregið úr fatakaupum á síðustu tveimur árum því velta faraverslunar var 26,3% meiri í desember 2007 en í desember síðastliðnum. Skóverslun í desember 2007 var 21,1% meiri en í desember síðastliðnum, mælt á föstu verðlagi.