Jón Ásgeir: Iceland Foods á peningana

Slitastjórn Glitnis heldur því fram að Jón Ásgeir Jóhannesson eða einhverjir tengdir honum hafi ráðið yfir þrjátíu og átta milljörðum króna í reiðufé á bankareikningum sínum aðeins 15 dögum áður en bankakerfið hrundi í október 2008. Jón Ásgeir segir hins vegar að Iceland Foods hafi átt peningana og eigi þá enn.

Í eiðsvarinni yfirlýsingu Steinunnar Guðbjartsdóttur, formanns slitastjórnar Glitnis banka, fyrir breskum dómstólum vegna kyrrsetningarmáls sem slitastjórn bankans hefur höfðað þar á hendur Jóni Ágeiri, segir Steinunn að rannsóknarteymi á vegum fyrirtækisins Kroll hafi fundið tölvupóst frá Jóni Ásgeiri til Lárusar Welding, þáverandi bankastjóra Glitnis, og Jóns Sigurðssonar, forstjóra FL Group. sem dagsettur er 22. september 2008, aðeins viku fyrir fall Glitnis.

Í póstinum, sem merktur er „Sterling deposits" kemur fyrir textinn „For your eyes only" og þar er tafla með innstæðum á bankareikningum í nokkrum breskum bönkum, HBOS, Barclays, Alliance & Leicester, HSBC og Bank of Ireland. Samtalan sýnir upphæðina 202 milljónir punda, eða jafnvirði 38 milljarða íslenskra króna.

Ekki liggur fyrir hver á þessa fjármuni, en í eiðsvörnum vitnisburði Steinunnar, sem er í 169 liðum og lagður var fram hinn 11. maí síðastliðinn, segir hún að sérfræðingar Kroll telji mjög ólíklegt að innstæðurnar hafi tilheyrt Glitni banka eða Baugi Group. Segir Steinunn að slitastjórnin telji að fjármunirnir hafi verið í eigu félags í eigu Jóns Ásgeirs eða tengds aðila.

Steinunn segir í vitnisburðinum: „Ég veit ekki hver eða hvaða fyrirtæki átti reikningana sem vitnað er til í Sterling-töflunni. Ég tel að það sé líklega einn eða fleiri af þeim sem sendu tölvupóstinn [Jón Ásgeir, Lárus Welding, Jón Sigurðsson] eða fyrirtæki eða einstaklingur sem tengist þeim."

Í þessu samhengi má benda á að greint hefur verið frá því að Arion banki gæti þurft að afskrifa yfir fjörutíu milljarða króna vegna lánveitingar til félagsins 1998 ehf. sem var móðurfélag Haga sem bankinn tók yfir í lok síðasta árs, en 1998 ehf. var í eigu Jóns Ásgeirs og fjölskyldu.

Jón Ásgeir gaf ekki kost á viðtali í dag. Í skriflegu svari við fyrirspurn fréttastofu síðdegis sagði hann að Iceland Foods hafi átt þessar innstæður sem hann hafi sent í tölvupóstinum til Jóns og Lárusar og ætti enn, en Baugur Group var stór hluthafi í Iceland. Verslanakeðjan Iceland Foods, sem er með þeim stærstu á breskum matvörumarkaði, er að mestu í eigu skilanefndar Landsbankans í dag eftir að skilanefndin gekk að veðum sínum, en Landsbankinn hafði fjármagnað kaup Baugs Group á fyrirtækinu að miklu leyti.

Ingibjörg Pálmadóttir, eiginkona Jóns Ásgeirs, er helsti eigandi 365 miðla ásamt lykilstjórnendum þess. Félagið var verðlagt á 5,9 milljarða króna haustið 2008 þegar félag sem þá hét Rauðsól keypti 365 miðla af félagi sem undir það síðasta var rekið undir nafni Íslenskrar afþreyingar. Jón Ásgeir hefur sjálfur lítið gefið út um persónuleg fjármál sín í viðtölum, en í viðtali við fréttastofu hinn 15. september á síðasta ári sagðist hann eiga meira en hann skuldaði. Þá lét hann jafnframt þau fleygu ummæli falla að hann ætti „nóg fyrir Diet Coke."

Lögmenn slitastjórnar telja Jón Ásgeir hafi ekki gert að fullu grein fyrir eignum sínum. Í skjali fyrir breskum dómstólum vegna kyrrsetningarmálsins sem slitastjórn Glitnis höfðaði sagði hann eigur sínar einnar milljónar punda virði, en það eru um 189 milljónir króna.