Sævar Pétursson ráðinn verkefnisstjóri hjá Akureyrarbæ

Sævar Pétursson hefur verið ráðinn verkefnisstjóri atvinnumála hjá Akureyrarbæ. Starfshópur um atvinnumál mælti með ráðingu hans en umsækjendur voru 48.

Í tilkynningu segir að Sævar sé viðskiptafræðingur að mennt frá Háskólanum á Bifröst og lagði auk þess stund á nám í íþrótta- og leiðtogafræðum á Nýja Sjálandi. Sævar var framkvæmdastjóri Baðhússins á árunum 1999-2002 og framkvæmdastjóri Sporthússins á árunum 2002-2008 en hann var meðal stofnenda fyrirtækisins og stýrði uppbyggingu þess frá grunni. Frá ársbyrjun 2009 hefur hann gengt starfi íþróttafulltrúa Skagafjarðar.

Verkefnisstjóri atvinnumála hjá Akureyrarbæ verður staðsettur á Akureyrarstofu og mun m.a. vinna að auknum tengslum og samstarfi bæjarins við fyrirtæki í bænum, greina og miðla upplýsingum um atvinnulífið og vinna með starfshópi um atvinnumál að mótun framtiðarstefnu bæjarins í málaflokknum.

Sævar er giftur 3 barna faðir. Hann mun taka til starfa í byrjun desember.