Landsbankinn lokaður, nema í Austurstræti

Í tilefni kvennafrídagsins hefur Landsbankinn ákveðið að loka öllum útibúum bankans kl. 14 í dag, nema útibúinu við Austurstræti þar sem hefðbundin þjónusta verður veitt. Í tilkynningu frá bankanum segir að þar verði þó einungis karlar við afgreiðslu.

„Einnig verður þjónustuveri bankans lokað. Þetta er gert til að gefa þeim konum sem starfa hjá Landsbankanum tækifæri til að taka þátt í hátíðahöldum í tilefni dagsins," segir ennfremur.

Þá segir að höfuðstöðvum bankans verði ekki lokað en hvatt er til þess að starfsemi einstakra sviða verði skipulögð með tilliti til aðstæðna þannig að sem flestir geti tekið þátt í viðburðum dagsins. „Að auki tekur Landsbankinn þátt í deginum með því að styrkja Skotturnar, regnhlífarsamtök kvennahreyfinga á Íslandi, vegna hátíðahaldanna."