Lifandi hænur rokseljast

Verð á lifandi hænum hefur rokið upp í Bretlandi undanfarin ár. Ástæðan er aukin spurn heimila og smábænda eftir slíkum húsdýrum. „Fólk vill komast í betri tengsl við náttúruna og það eykur áhuga fólks," segir Shelley Sanders, sem vinnur á kjúklingabúi í Dorsetsýslu í Englandi. Hún segir við breska blaðið Daily Mail að býlið selji 300 lifandi hænur á mánuði. Mögulegt væri að selja mun fleiri hænur ef býlið gæti ræktað þær.

Aðdáendur hænsna segja að það sé auðvelt að rækta þær og gaman að horfa á þær. En það sem skiptir eflaust mestu máli er að þær geta sparað manni pening. „Það er auðveldlega hægt að spara 180 pund á ári með þrjá kjúklinga í garðinum," segir Sanders. Upphæðin samsvarar tæpum 34 þúsund krónum. Sanders segir ástæðuna vera þá að hænurnar verpi á hverjum degi og maður þurfi því aldrei að kaupa eigin egg.

Ein hæna kostar núna 15 pund, eða sem samsvarar um 2800 krónum íslenskum. Verðið var hins vegar rúmar 900 krónur fyrir tveimur árum síðan. Ætli maður hins vegar að fá hreinræktaðan fugl getur hann kostað um 7500 krónur.