Viðskipti erlent

Hæstbjóðendur í West Ham féllu á tíma

Hópur fjárfesta undir nafninu Intermarket, sem taldir eru eiga hæsta tilboðið í enska úrvalsdeildarliðið West Ham, féllu á tíma með tilboð sitt. Samkvæmt frétt á vefsíðu Times áttu þeir að skila inn gögnum um fjárhagslega styrk sinn til kaupanna fyrir klukkan sex síðdegis í gær en gerðu það ekki.

Í fréttinni segir að salan á West Ham gæti legið fyrir á næstu 24 klukkutímunum. Straumur, sem á meirihlutann í liðinu, vill selja hluta liðsins eða liðið í heild. Skuldir liðsins nema 80 milljónum punda en Straumur hefur sett 100 milljóna punda verðmiða á West Ham.

Auk Intermarket hafa Tony Fernandes, fjárfestir frá Malasíu sem m.a. á AsiaAir, og félagarnir David Sullivan og David Gold fyrrum eigendur Birmingham, einnig sýnt því áhuga á að kaupa West Ham. Misvísandi upplýsingar hafa birst í breskum fjölmiðlum um hvort Fernandes sé enn inn í myndinni. Hinsvegar hljóðar tilboð þeirra Sullivan og Gold upp á 50 milljónir punda fyrir helmingshlut í West Ham.

Fram kemur í fréttinni að ef salan á West Ham mistekst þurfi Straumur að leggja út 10 milljónir punda fyrir apríllok til að mæta skuldbindingum liðsins eins og til dæmis leikmannakaupum. Þetta gæti leitt til þess að liðið neyddist til að selja leikmenn á móti.

Intermarket segir að tímafrestur sá þeim þeim var gefinn hafi verið felldur niður.





Mest lesið


Fleiri fréttir

Sjá meira


×

Mest lesið