Fjörkippur í sölu atvinnuhúsnæðis á höfuðborgarsvæðinu

Í september 2010 var 47 skjölum (kaupsamningum og afsölum) um atvinnuhúsnæði á höfuðborgarsvæðinu þinglýst og 50 utan þess. Heildarfasteignamat seldra eigna á höfuðborgarsvæðinu var 1.955 milljónir króna en 566 milljónir króna utan þess. Um er að ræða um 50% aukningu frá fyrri mánuði hvað fjölda skjala varðar á höfuðborgarsvæðinu en um 30% hvað fasteignmat varðar.

Þetta kemur fram á vefsíðu Þjóðskrár Íslands, Þar segir að af þessum samningum voru 12 um verslunar- og skrifstofuhúsnæði á höfuðborgarsvæðinu. Í fyrri mánuði var um 8 samninga um verslunar- og skrifstofuhúsnæði að ræða.

Í september voru skráðir í kaupskrá 14 kaupsamningar um atvinnuhúsnæði á höfuðborgarsvæðinu og 17 utan þess. Heildarupphæð samninga á höfuðborgarsvæðinu var 444 milljónir króna og fasteignamat þeirra eigna sem samningarnir fjölluðu um 277 milljónir króna.

Heildarupphæð samninga utan höfuðborgarsvæðisins var 368 milljónir króna og fasteignamat þeirra eigna sem samningarnir fjölluðu um 113 milljónir króna. Af þessum samningum voru 4 um verslunar- og skrifstofuhúsnæði á höfuðborgarsvæðinu.