Ríkissjóður rekinn með 150 milljarða halla í fyrra

Í tilkynningu um uppgjörið segir að tekjur reyndust 30,1 milljarða kr. minni en í fyrra á meðan gjöldin lækkuðu um 92,5 milljarða kr.

Í árslok 2008 voru afskrifaðar tapaðar kröfur að upphæð tæpum 200 milljarða kr. sem hafði veruleg áhrif á bæði greidd gjöld desembermánaðar og breytingu viðskiptahreyfinga.

Innheimtar tekjur ríkissjóðs á árinu 2009 voru 414,6 milljarðar kr. samkvæmt bráðabirgðatölum Fjársýslunnar. Það er 33,4 milljarða kr. minna en tekjur fyrra árs ef miðað er við endanlega niðurstöðu ársins 2008 (en þá munaði 0,8% á bráðabirgðatölum og endanlegum tölum ríkisreiknings á greiðslugrunni.) Heildartekjurnar eru 4,9% meiri en í áætlun fjárlaga og skatttekjurnar 1,0% meiri.

Skatttekjur og tryggingagjöld námu 360,7 ma.kr. sem er 7,8% samdráttur að nafnvirði eða 20,6% að raunvirði miðað við hækkun almenns verðlags (VNV án húsnæðis). Skattar á tekjur og hagnað námu 138,8 milljarða kr. og drógust saman um 9,2% að nafnvirði og 21,8% að raunvirði samanborið við janúar-desember 2008. Það ber að hafa í huga að breyttar reglur um skil á fjármagnstekjuskatti skekkja samanburð milli ára.

Greidd gjöld nema 551,5 milljörðum kr. og lækka um 92,5 milljarða kr. frá fyrra ári, eða um 14,4%. Óregluleg útgjöld skýra þessa lækkun en þau lækka um 189,5 miljarða kr. milli ára. Þessi lækkun skýrist að öllu leyti með liðnum tapaðar kröfur og tjónabætur en í lok árs 2008 var bókfært tap á kröfum sem ríkissjóður yfirtók frá Seðlabanka Íslands vegna falls bankanna að upphæð tæpum 200 milljarða kr.

Milli ára hækka útgjöld vegna almennrar opinberrar þjónustu mest eða um 56,6 milljarða kr. þar sem vaxtagjöld ríkissjóðs skýra 50,3 milljarða kr. Útgjöld til almannatrygginga og velferðarmála aukast um 25,3 milljarða kr. sem skýrist að mestu með 22,6 milljarða kr. hækkun útgjalda Atvinnuleysistryggingasjóðs, 3,4 milljarða kr. hækkun á vaxtabótum og 1,2 milljarða kr. hækkun á barnabótum.