Erlendum ferðamönnum fjölgaði um 12% milli ára í október

Erlendir ferðamenn voru 12,2% fleiri nú í október síðastliðnum samanborið við október í fyrra. Þannig fóru rúmlega 34 þúsund erlendir gestir frá landinu um Leifsstöð nú í október samanborið við rúm 30 þúsund árið á undan.

Þetta kemur fram í Morgunkorni greiningar Íslandsbanka. Þar segir að þetta sé mesta fjölgun erlendra gesta sem orðið hefur á einum mánuði m.v. sama mánuð árið á undan á þessu ári og er þetta annar stærsti októbermánuður frá upphafi þess tímabils sem Ferðamálastofa hefur haldið úti talningum.

Þannig voru erlendir ferðamenn lítið eitt fleiri í október árið 2007, eða 34.175 á móti 34.069. Talningar stofnunarinnar ná yfir allar brottfarir gesta frá landinu um Leifsstöð en það var Ferðamálastofa sem sendi frá sér fréttatilkynningu um þetta síðastliðinn föstudag.

Ef tekið er mið af fyrstu tíu mánuðum hvers árs frá því að talningar Ferðamálastofu hófust má sjá að árið í ár kemur mjög vel út í samanburðinum hvað fjölda erlendra ferðamanna varðar. Í raun er þetta þriðja fjölmennasta árið sem er sigur fyrir íslenska ferðaþjónustu, sér í lagi miðað við þær náttúruhamfarir sem urðu hér fyrr á árinu og höfðu veruleg áhrif á flugsamgöngur, og þar með komu erlendra gesta til landsins.

Frá áramótum talið hafa þannig farið rúmlega 419 þúsund erlendir ferðamenn frá landinu um Leifsstöð í ár samanborið við rétt tæp 426 þúsund í fyrra og jafngildir þetta fækkun upp á 1,6%. Ljóst er að ferðamönnum hefði fækkað mun minna ef gosið hefði ekki sett strik í reikninginn, og ekki er ólíklegt að þá hefði verið um fjölgun að ræða.