Völd Icesave-arkitektsins aukast enn

Landsbankinn er að eignast bæði Atorku og Icelandic Group og munu fyrirtækin renna inn í Vestia, dótturfélag Landsbankans. Gert er ráð fyrir að Steinþór Baldursson, framkvæmdastjóri Vestia, verði stjórnarformaður beggja fyrirtækja.

Á hluthafafundi Atorku á morgun verður lögð fram tillaga stjórnar um niðurfærslu hlutafjár í samræmi við nauðasamning félagsins. Í framhaldinu verður hlutafé hækkað aftur og kröfuhafar taka Atorku yfir. Landsbankinn sem stærsti kröfuhafi félagsins verður meirihlutaeigandi.

Steinþór Baldursson, framkvæmdastjóri Vestia, dótturfélags Landsbankans, sagði í samtali við fréttastofu að ný stjórn yrði kjörin í Atorku í febrúar. Er gert ráð fyrir að Steinþór verði stjórnarformaður félagsins, en tekin verður lokaákvörðun um það þegar nær dregur. Steinþór Valur Ólafsson, starfsmaður Vestia, hefur þegar verið skipaður stjórnarformaður Prómens, en fyrirtækið er ein helsta eign Atorku.

Þá er Icelandic Group, sem áður starfaði undir merkjum Sölumiðstöðvar hraðfrystihúsanna, einnig að renna í faðm Landsbankans, en ekki liggur fyrir hvenær fulltrúi Vestia kemur að stjórn félagsins með formlegum hætti. Steinþór Baldursson sagði í samtali við fréttastofu að gert væri ráð fyrir að hann yrði stjórnarformaður Icelandic Group sem fulltrúi Vestia. Eins og fréttastofa hefur áður greint frá er Steinþór eini lykilstjórnandi Landsbankans sem kom að Icesave-verkefninu á stjórnunarstigi, sem enn er í stjórnunarstöðu hjá bankanum, en Steinþór stýrði þar verkferlum og var eins konar hægri hönd Sigurjóns Þ. Árnasonar bankastjóra í málum tengdum Icesave.

Vestia hefur þegar tekið yfir bæði Húsasmiðjuna og Teymi, móðurfélag Vodafone og Tals. Steinþór er stjórnarformaður Húsasmiðjunnar og situr í stjórn Teymis. Steinþór sagði í samtali við fréttastofu að vegna verkefna sem tengjast yfirtökunni á Icelandic Group myndi hann fara úr stjórnum nokkurra fyrirtækja sem hann sæti nú í fyrir hönd Vestia og nefndi þar Geysi Green Energy og Teymi til sögunnar.