FA vill álitamál um gengistryggingu fyrir dómstóla

Þetta kemur fram í umfjöllun um málið á vefsíðu FA. Þar segir að það sé mikilvægt að stjórnvöld hlutist til um að hraða umræddu ferli eins og kostur er. Að sama skapi þurfa fjármálastofnanir að gæta þess að ganga ekki á rétt lántaka á grundvelli umdeildra heimilda.

Félag atvinnurekenda leggur því til að:

Ríkisstjórn skipi strax sérfræðinganefnd sem fari yfir málefni tengd gengistryggðum lánum og leggi fram lista af helstu álitaefnum sem nauðsynlegt er að fá úrskurð dómstóla um. Þessari vinnu ljúki fyrir mánudaginn 28. júní.

Ríkisstjórn setji lög eða skapi önnur réttarfarsúrræði til að dómstólar geti forgangsraðað þannig að öll mál tengd gengistryggingu verði tekin fyrir eins fljótt og auðið er. Dómarar verði eftir atvikum kallaðir úr réttarhléi eða þau stytt.

Hagsmunaaðilar - jafnt lántakendur sem lánveitendur - láti reyna á álitaefni fyrir dómstólum. Meðferð þessara mála verði flýtt eins og kostur er en án þess þó að skaða eðlilegan málatilbúnað.

Í stað ofangreinds má hugsa sér að stærri hagsmunaaðilar sameinist um að skipa gerðardóm um mál sem tengjast gengistryggingu.

„Við höfum reynslu af faglegri vinnu Rannsóknarnefndar Alþingis. Finna þarf sambærilega aðila til að vinna við að skýra málefni gengistryggðra lána. Það þarf að vinna hratt enda eru hagsmunir tugþúsunda heimila og fjölmargra fyrirtækja í húfi. Við teljum að skoða þurfi gengistryggingu fyrst enda er búið að dæma hana ólögmæta. Annað þyrfti að skoða í framhaldinu," segir Almar Guðmundsson, framkvæmdastjóri FA.

„Lausn á þessum málum mun að öllum líkindum létta byrðum af heimilum og auka ráðstöfunartekjur þeirra. Það eitt og sér ýtir undir neyslu, fjárfestingu og hagvöxt, auk þess að draga úr atvinnuleysi. Það er einnig mikilvægt að fyrirtækin þekki stöðu sína áður en gengið er til kjarasamninga."