Elin Nordegren: Gekk í gegnum helvíti

Elin Nordegren, fyrrverandi eiginkona Tiger Woods, segist hafa gengið í gegnum helvíti eftir að upp komst um svik kylfingsins. Elin hefur nú rofið þögnina og tjáð sig í fyrsta sinn um framhjáhaldið en eins og frægt er orðið stigu á annan tug kvenna fram í sviðsljósið á síðasta ári og fullyrtu að þær hefðu átt í sambandi við Tiger.

Í viðtali við bandaríska tímaritið People Magazine segist Elin hafa elskað Tiger og fundist gott að vera gift honum. Hún hafi ekki haft minnsta grun um að eiginmaður hennar væri að halda framhjá sér. Frá því að upp komst um svikin segist Elina hafa gengið í gegnum afar erfiða tíma sem hafi verið hreint helvíti en hún horfi þó björtum augum til framtíðarinnar.

Elin og Tiger giftust árið 2004 og eiga saman tvö ung börn. Fyrr í vikunni var tilkynnt um skilnað þeirra. Ekki liggur fyrir hversu háa fjárhæð Elin fær frá Tiger en þau munu hafa sameiginlegt forræði yfir börnunum.

Tiger tók sér tímabundið frí frá golfinu eftir að upp komst um framhjáhald hans en frá því að hann hóf keppni á nýjan leik hefur fátt gengið upp hjá honum. Framhjáhaldið varð Tiger mikill álitshnekkir og telja margir að hann muni ekki nái aftur þeim vinsældum sem hann hafði umfram aðra íþróttamenn.