ABC News: Hvernig íslensku útrásarvíkingarnir strönduðu

Bandaríska sjónvarpsstöðin ABC mun fjalla ítarlega í kvöld um það hvernig íslensku útrásarvíkingarnir sigldu í strand. Umfjöllunin verður í hinum þekkta fréttaþætti „20/20" og þar verður m.a. rætt við Ólaf Arnarson höfund bókarinnar „Sofandi að feigðarósi" og Bubba Morthens.

Samkvæmt umfjöllun um málið á heimasíðu ABC verður farið yfir þróun mála á Íslandi allt frá árinu 2002 þegar örlagaríkar ákvarðanir voru teknar um einkavæðingu bankanna og fram til dagsins í dag.

Fyrir utan þá Ólaf og Bubba er vitnað í Geir Haarde fyrrum forsætisráðherra og rætt við hjónin Ingu Pétursdóttur og Einar Baldursson sem lentu í miklum fjárhagsörðugleikum í kjölfar þess að íslenska bólan sprakk með hvelli. Þau Inga og Einar eru smám saman að endurbyggja líf sitt að nýju sem og bankareikninga sína.

„Þetta hefur kennt okkur að einbeita okkur að hinum raunverulegu hlutum í lífinu. Og ég held að þetta...hafi verið gott spark í rassgatið," segir Inga í umfjöllun ABC.