Jöklabréfastærðin komin niður í 80 milljarða

Útistandandi jöklabréf eru nú komin niður í 80 milljarða kr. Þegar mest lét námu þau um 450 milljörðum kr. árið 2007. Við bankahrunið s.l. haust voru þau komin í um 300 milljarða kr. Síðan hefur þeim verið breytt í ríkisbréf, einkum eftir tilkomu gjaldeyrishaftanna.

Hagfræðideild Landsbankans fjallar um málið í Hagsjá sinni. Þar segir að heildarvirði útistandandi jöklabréfa hafi fallið hratt að undanförnu en frá áramótum hafa jöklabréf að nafnvirði tæplega 170 milljarða kr. fallið á gjalddaga.

Þessu til viðbótar er á morgun, 17. júní, gjalddagi á 4 milljarða kr. jöklabréfi sem gefið var út af Rentenbank, sem er eins konar lánastofnun landbúnaðarins í Þýskalandi. Að þeim gjalddaga loknum eru aðeins rúmlega 80 milljarðar kr. jöklabréfa enn útistandandi, en til samanburðar voru alls útistandandi jöklabréf að andvirði yfir 450 milljarða kr. þegar mest lét haustið 2007.

„Vegna takmarkana á fjármagnsflutningum er þó ljóst að stærstur hluti þeirra höfuðstólsgreiðslna sem fallið hafa til frá því í haust hefur ekki verið fluttur úr landi. Að auki hefur Seðlabankinn nýlega birt túlkun þess efnis að heldur ekki sé heimilt að skipta vaxtagreiðslum af jöklabréfum, þ.e. erlendum skuldabréfum sem gefin eru út af erlendum aðilum í krónum, yfir í erlendan gjaldeyri. Þetta fé hefur því þurft að leita í aðra innlenda ávöxtun, svo sem ríkisskuldabréf, víxla eða innlán," segir í Hagsjánni.