Slóvakar taka upp evru

1. janúar 2009 14:26

Robert Fico, forsætisráðherra Slóvakíu, sýnir stoltur evruseðlana í þinghúsinu. Mynd/AFP

Slóvakar tóku upp evru í dag og varð landið þar með sextánda aðildarríki myntbandalags Evrópusambandsins.

Allt að hundrað þúsund manns komu saman á aðaltorginu í Bratislava, höfuðborg Slóvakíu í gærkvöldi í tilefni bæði áramótanna og myntbreytingarinnar. Þá var Robert Fico, forsætisráðherra landsins, einn fyrstur landsmanna til að taka sér seðlinn í hendur þegar hann tók út hundrað evrur úr hraðbanka þinghússins.

Kórúnan, gjaldmiðill Slóvaka fram til þessa, verður í umferð til 16. þessa mánaðar, að sögn breska ríkisútvarpsins, BBC.

Ríkisútvarpið segir Slóvaka telja evruupptökuna af hinu góða og hafa varið landið frá þeim óstöðugleika í gengismálum sem hrjáð hafi nágrannaríkin.

Kórúnan var fasttengd evru í júlí á síðasta ári.

Á sama tíma hefur gjaldmiðill Pólverja fallið um 24 prósent gagnvart evru en tékkneska kórúnan um ellefu prósent. Gjaldmiðlar annarra nágrannaríkja hafa fallið í kringum tíu prósent á sama tíma, samkvæmt upplýsingum Bloomberg-fréttaveitunnar.

Erlent Fréttir Viðskipti

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.