Vilja kaupa Karen Millen og Oasis af Kaupþingi

Tískuvörurisinn Debenhams er nú sagður íhuga að fjárfesta í verslunarkeðjunum Karen Millen og Oasis sem nú eru í eigu Kaupþings en áður Baugs. Bloomberg segir frá þessu í kvöld en þetta er haft eftir innanbúðarmanni hjá Debenhams.

Áhuginn er sagður vera á Aurora Fashions Ltd. sem er einnig með merki eins og Coast og Warehouse á sínum snærum. Heimildarmaður Bloomberg vill ekki láta nafn síns getið þar sem um trúnaðarmál er að ræða.

„Þú getur fengið Aurora á kostakjörum nú, segjum 100 milljónir punda," segir Nick Bubb sérfræðingur hjá Pali International í London. „Þeir eru með mörg flott merki. Þetta gæti verið sniðugt."

Talsmaður Aurora segir hinsvegar að Kaupþing hafi litið á félagiði sem langtíma fjárfestingu og sé ekki á þeim buxunum að selja. Hann bætti því einnig við að allt væri á áætlun.

Starfsmenn Debenhams neituðu að tjá sig um þennan orðróm.