Kaupþing setur 29% hlut sinn í JJB Sports á uppboð

Í dag mun Kaupþing setja tæplega 29% hlut sinn í íþróttavöruverslanakeðjunni JJB Sports á uppboð í London. Bæði Ernst 6 Young og PricewaterhouseCoopers munu annast söluna en alls er um 65 milljón hluti að ræða í JJB Sports.

Samkvæmt umfjöllun í breska blaðinu Telegraph var þessi hlutur í sameiginlegri eigu Chris Ronnie fyrrum forstjóra JJB Sports og Exista en Kaupþing tók hann til sín með veðkalli fyrr í vetur. Að sögn Ronnie án vitundar hans.

Fram kemur í Telegraph að salan á fyrrgreindum hlut muni liðka til fyrir rannsókn á störfum Ronnie sem forstjóra JJB Sports. Talið er að hann eigi á hættu að fá á sig skaðabótamál vegna tapreksturs sem nemur 130 milljónum punda eða vel yfir 20 milljarða kr.

Fjármálaeftirlit Bretlands hefur þegar hafið rannsókn á því hvernig hluturinn komst í hendur Kaupþings og jafnframt er stjórn JJB Sports að íhuga að kæra Ronnie til samkeppniseftirlits landsins.