Byggingarkostnaður eykst meðan íbúðaverð lækkar

Alger umsnúningur hefur orðið á tengslunum milli íbúðaverðs og byggingarkostnaðar á undanförnum 18 mánuðum. Byggingarkostnaðurinn hefur aukist um 33% á meðan íbúðaverð hefur lækkað um 12% á þessu tímabili.

Hagfræðideild Landsbankans fjallar um málið í daglegu fréttabréfi sínu en Hagstofan greindi frá því í gær að vísitala byggingarkostnaðar hefði hækkað um 0,2% í maí m.v. sama mánuð í fyrra. Hefur vísitalan því hækkað um 11,8% sem er lægsta 12 mánaða hækkun síðan í mars í fyrra.

Hagfræðideildin segir að á undanförnum árum hafi íbúðaverð hækkað mun meira en byggingarkostnaður sem skapaði mikinn hagnað hjá byggingarverktökum.

„Þessi þróun hefur nýlega tekið skarpa U-beygju," segir deildin.