Bankaleynd hérlendis svipuð og í öðrum löndum

Það er niðurstaða nýrrar skýrslu að ákvæði íslenskra laga um trúnaðar- og þagnarskyldu fjármála- og eftirlitsstofnana séu í aðalatriðum sambærileg reglum samanburðarríkjanna. Af niðurstöðu skýrslunnar má ráða að nokkur munur sé á reglum um þagnarskyldu eftirlitsaðila, að því er varðar þá sem miðla má upplýsingum til.

Minni takmarkanir er t.d. að finna í dönskum og breskum rétti á því hverjir geta fengið aðgang að upplýsingum frá fjármálaeftirliti en í íslenskum, norskum og þýskum rétti. Niðurstaða þessi er þó sett fram með fyrirvara um nýjar heimildir íslensks réttar vegna hlutverks sérstaks saksóknara og rannsóknarnefndar um fall íslensku bankanna og hugsanlegar heimildir á öðrum sviðum réttarins.

Greint er frá málinu á vefsíðu stjórnarráðsins. Þar segir að vegna umfjöllunar um bankaleynd að undanförnu ákvað viðskiptaráðuneytið að fá sérfræðing til að vinna skýrslu um bankaleynd og var Dóra Guðmundsdóttir lögfræðingur fengin til verksins.

Í skýrslunni er að finna yfirlit um ákvæði íslenskra laga um trúnaðar- og þagnarskyldu fjármála- og eftirlitsstofnana og samanburð við sambærilegar reglur í Danmörku, Noregi, Þýskalandi og Bretlandi. Jafnframt er gerður almennur samanburður á íslenskum reglum og reglum Sviss, Lúxemborgar og Liechtenstein sem þekkt eru fyrir ríka bankaleynd.

Í skýrslunni er í fyrsta lagi fjallað um hugtakið bankaleynd. Þar kemur fram að hugtakið er ekki skilgreint í íslenskum lögum og einnig að í almennri umræðu sé hugtakið rýmra en lagaleg afmörkun þess bendi til.

Þá kemur fram að hér á landi sé þagnarskylda starfsmanna um upplýsingar um viðskiptavini lögbundin, líkt og í Noregi og Danmörku og að brot á þagnarskyldunni varði refsingu. Í öðrum ríkjum, t.d. í Þýskalandi og Bretlandi, byggi þagnarskyldan á samningi aðila þar sem brot á þagnarskyldu varði einkaréttarlegum viðurlögum frekar en refsiviðurlögum. Þá er fjallað um dómaframkvæmd um ákvæði um bankaleynd og um tengsl ákvæða um þagnarskyldu og upplýsingaskyldu.

Í framhaldi af þessu mun viðskiptaráðuneytið fara yfir niðurstöður skýrslunnar og gera tillögur um breytingar. Þá er einnig á vegum ráðuneytisins unnið að breytingum á reglum um upplýsingagjöf um eignarhald og tengsl eigenda fjármálafyrirtækja.