Spáir því að ársverðbólgan verði 10,8% í maí

Greining Íslandsbanka telur að vísitala neysluverðs (VNV) muni hækka um 0,4% í maí. Gangi spá greiningarinnar eftir mun 12 mánaða verðbólga lækka úr 11,9% í 10,8%.

Fjallað er um málið í Morgunkorni greiningarinnar. Þar segir að það sé mat hennar að hækkandi eldsneytisverð og annar kostnaður tengdur bifreiðum reynist drýgsti hækkunarvaldur VNV að þessu sinni.

Einnig muni gæta áhrifa lækkunar krónu í þeim vöruflokkum sem hafa hægastan veltuhraða og/eða árstíðatengt vöruframboð. Má þar nefna föt og skó, heimilisbúnað og tómstundavörur. Á móti er gert ráð fyrir lækkun húsnæðisliðar vísitölunnar vegna lækkandi markaðsverðs á íbúðarhúsnæði.

Sú lækkun gæti þó orðið með minna móti í maímánuði ef marka má gögn um markaðsverð af vef Fasteignaskrár Íslands. Áhrif annarra liða verða væntanlega minni. Hagstofan mun birta VNV 26. maí næstkomandi kl. 9:00.

Þótt hækkun VNV kunni að reynast töluvert meiri á öðrum ársfjórðungi en raunin var á fyrstu mánuðum ársins telur greiningin að 12 mánaða verðbólga mun hjaðna hratt eftir því sem á árið líður og gæti verðbólga reynst í námunda við markmið Seðlabankans í árslok.