Skuldatryggingaálag á ríkissjóð fer stöðugt lækkandi

Skuldatryggingaálagið á íslenska ríkið hefur stöðugt farið lækkandi allan ágústmánuð og Í morgun stóð álagið í 468 punktum. Til samanburðar má nefna að í upphafi júlímánaðar stóð álagið í 660 punktum og hefur því lækkað um tæpa 200 punkta frá þeim tíma.

Þrátt fyrir að skuldatryggingar á íslenska ríkið hafi lækkað töluvert að undanförnu er landið samt sem áður í fimmta sæti þeirra þjóða sem mest er talin hætta á að lendi í gjaldþroti samkvæmt lista sem CMAvision birtir daglega.

Hinsvegar hafa líkurnar sem taldar eru á þjóðagjaldþroti Íslands einnig minnkað töluvert samkvæmt listanum og eru nú um 27%. Í byrjun júlí stóðu þessar líkur í tæpum 37%.

Þegar álagið var sem hæst í vetur nam það vel yfir 800 punktum svo að segja má að landið sé á réttri leið hvað þetta varðar.

Skuldatryggingaálag á ríkissjóð í 468 punktum samsvarar því að reiða þurfi fram tæp 4,7% af nafnverði skuldabréfs til að tryggja eiganda þess gegn greiðslufalli næstu 5 árin.

Sem fyrr segir er Ísland áfram í fimmta sæti hjá CMA yfir þær 10 þjóðir sem hafa hæsta skuldartrygginaálag í heiminum þrátt fyrir þessa miklu lækkun. Þetta skýrist af því að álagið hefur einnig farið lækkandi hjá hinum þjóðunum sem skipa listann. Sem dæmi má nefna að líkurnar á þjóðargjaldþroti Argentínu, sem trónir efst á listanum, eru nú metnar 63%. Í byrjun júlí voru líkurnar í 72%.

Eins og áður hefur komið fram í fréttum hér á síðunni um málið má rekja lækkunina á álaginu á ríkissjóð m.a. til umsóknar um aðildarviðræður við ESB, endurskipulagningu bankanna og nú síðast líkur á að Icesave málinu sé að ljúka. Í síðustu viku kom fram jákvætt mat frá matsfyrirtækinu Moody´s um Icesave samkomulagið.