Töluverð aukning aflaverðmætis

Aflaverðmæti íslenskra skipa nam tæpum 42 milljörðum króna fyrstu fimm mánuði ársins 2009, samanborið við 40 milljarða á sama tímabili 2008. Aflaverðmæti hefur því aukist um tæpa 2 milljarða eða 4,2% á milli ára samkvæmt Hagstofu Íslands.

Aflaverðmæti botnfisks var í lok maí orðið 33 milljarðar á árinu sem er aukning um 5,8% frá sama tíma í fyrra þegar aflaverðmætið nam tæpum 31 milljarði.

Verðmæti þorskafla var um 16 milljarðar og stóð nokkurn vegin í stað milli ára.

Aflaverðmæti ýsu nam um 6,5 milljörðum og dróst saman um 5,1% frá árinu 2008.

Verðmæti karfaaflans nam tæpum 5 milljörðum, sem er 57% aukning frá fyrstu fimm mánuðum ársins 2008, og verðmæti ufsaaflans dróst saman um 6,3% milli ára í rúma 2 milljarða króna.

Verðmæti annars botnfisksafla jókst í heild um 28% frá árinu 2008

Verðmæti flatfiskafla nam rúmum 3,5 milljörðum króna í janúar til maí 2009, sem er 40% aukning frá fyrra ári. Aflaverðmæti uppsjávarafla dróst hins vegar saman um 17% milli ára og nam 5 milljörðum.

Verðmæti afla sem seldur er í beinni sölu útgerða til vinnslu innanlands nam um 17 milljörðum króna fyrstu fimm mánuði ársins og jókst um 1,4% frá fyrra ári.

Verðmæti afla sem keyptur er á markaði til vinnslu innanlands dróst saman um 8,2% milli ára og var um 6 milljarðar króna.

Aflaverðmæti sjófrystingar nam 12 milljörðum, samanborið við 11 milljarða árið áður.

Verðmæti afla sem fluttur er út óunninn nam um 5,6 milljörðum, sem er 20,5% aukning miðað við tímabilið janúar til maí 2008.