Viðskipti í kauphöllinni margfaldast milli mánaða

Heildarviðskipti með hlutabréf í septembermánuði námu rúmum 13 milljörðum kr. eða rúmum 595 milljónum kr. á dag. Þessu til samanburðar var veltan með hlutabréf í ágúst mánuði rúmir 2,2 milljarðar kr.

Þetta kemur fram í yfirliti frá kauphöllinni um viðskiptin í September. Þar segir að mest voru viðskipti með bréf Bakkavör Group (BAKK) 8.377 milljónir kr. og með bréf Alfesa (A) 2.138 milljónir kr. Markaðsvirði skráðra félaga var 204 milljarðar kr. í lok síðasta mánaðar og lækkaði um 1% á milli mánaða.

Markaðsvirði bréfa Össurar nam rúmum 52 milljörðum kr. og er það félag stærst að markaðsvirði skráðra félaga. Næst í stærð er Marel en markaðsvirði þess nemur rúmum 38 milljörðum kr. og síðan bréf Føroya Banki en markaðsvirði þess er rúmir 35 milljarðar kr.

Úrvalsvísitalan (OMXI6) lækkaði um 1,17% milli mánaða og stendur nú í 809,3 stigum. Af atvinnugreinavísitölum hækkaði vísitala iðnaðar (IX20PI) mest eða 3,5%.

Á Aðalmarkaði kauphallarinnar var MP banki með mestu hlutdeildina 64,2% (20,6% á árinu), Nýi Kaupþing banki með 18% (28,9% á árinu) og NBI með 11,3% (12,3% á árinu).

Heildarviðskipti með skuldabréf námu rúmum 259 milljörðum kr. í septembermánuði sem samsvarar 11,8 milljarða kr. veltu á dag. Í ágústmánuði nam veltan 16,1 milljörðum kr. á dag. Mest voru viðskipti með lengstu flokka ríkisbréfa, RIKB 19 0226 38,4 milljarðar kr. og þá með RIKB 13 0517 37 milljarðar kr.

Alls námu viðskipti með ríkisbréf 163,8 milljörðum kr. en viðskipti með íbúðarbréf námu 82,8 milljörðum kr. Heildarmarkaðsvirði skráðra skuldabréfa nam tæpum 1.323 milljörðum kr. og lækkaði um 1,25% milli mánaða.

Í septembermánuði var MP Banki með mestu hlutdeildina 36,3% (30,3% á árinu), Íslandsbanki með 28,1% (28,4% á árinu) og NBI með 14% (13,1% á árinu).